Kryeministri i Shqipërisë Edi Rama do të prezantojë nesër qeverinë e re të mandatit të katërt, si dhe programin qeverisës për katër vitet e ardhshme.
Asambleja Kombëtare e Partisë Socialiste (PS) do të mblidhet në orën 09:30, në hollin e Pallatit të Kongreseve, ndryshe nga raportimet e para që e vendosnin takimin në Xibrakë.
Fjalën hapëse do ta mbajë sekretari i përgjithshëm Blendi Klosi, ndërsa pjesa kryesore e punimeve do t’i takojë kryeministrit Rama.
Fillimisht, kreu i qeverisë do të paraqesë programin për katër vitet e ardhshme dhe më pas do të bëjë publik kabinetin e ri qeveritar.
Organizatorët po përmbyllin përgatitjet e fundit që gjithçka të jetë gati të enjten, më 11 shtator.
Një ditë më pas, të premten, parlamenti i ri i dalë nga zgjedhjet e 11 majit do të mblidhet në dy seanca të ndara, ku 140 deputetët do të bëjnë betimin dhe do të zgjidhet kryetari i ri i Kuvendit.