Prokuroria Themelore në Gjakovë, ka ngritur aktakuzë kundër E.M., i dyshuar për posedim dhe shpërndarje të substancave narkotike dhe mbajtje të armëve pa autorizim.
Sipas aktakuzës, më 11 gusht 2025, i pandehuri është ndaluar nga policia gjatë një kontrolli në rrugën “Gasper Karaqi” në Gjakovë, ku në çantën e tij janë gjetur gjashtë qese me substancë narkotike.
Pas kontrollit në banesën e tij, policia sekuestruar kokainë me peshë 342.06 gram, peshore digjitale, gërshërë, lugë metalike, shirit ngjitës, qese të vogla dhe një shkrepës, të gjitha të lidhura me përgatitjen dhe shpërndarjen e narkotikëve.
Aktakuzës i shtohet edhe mbajtja pa autorizim e një pistoletë me gaz dhe karikatori.
“Sipas aktakuzës, ndër të tjera ceket se më datë 11.08.2025 rreth orës 21:25 në Gjakovë Rr. “Gasper Karaqi”, i pandehuri me qëllim të shitjes ose shpërndarjes pa autorizim posedon, substanca apo preparate të cilat me ligj janë shpallur si narkotikë, substanca psikotrope ose analoge, në atë mënyrë që derisa i pandehuri ka qenë duke lëvizur përgjatë rrugës së lartcekur me automjetin e tij Audi A6 me targa të regjistrimit …., në një pik kontrolli është ndalur nga zyrtarët policor të NJRSH-së, ku gjatë kontrollit në çantën e të pandehurit gjenden dhe sekuestrohen gjashtë (6) qese të mbushura me substancë narkotike, ashtu që nga ana e hetuesve në mënyrë urgjente është kryer kontrolli dhe bastisja në banesën e të pandehurit me ç’rast janë gjetur dhe sekuestruar substanca narkotike, një peshore digjitale, dy palë gërshërë, një lugë metalike, shirit ngjitës, shkrepës dhe qese të vogla të zbrazëta, të cilat kanë shërbyer për përgatitjen dhe më pas shitjen apo shpërndarjen e substancës narkotike, të cilat janë sekuestruara nga hetuesit policor, me ç’rast pas ekzaminimit nga AKF sipas raportit është konstatuar substancë narkotike e llojit kokainë me peshë të përgjithshme 342.06 gram”, thuhet në njoftim.
E.M. akuzohet për veprat penale “Blerja, posedimi, shpërndarja dhe shitja e paautorizuar e narkotikëve” dhe “Mbajtja në pronësi, kontroll ose posedim të paautorizuar të armëve”.
Prokurori ka kërkuar nga gjykata që i pandehuri të shpallet fajtor dhe të dënohet sipas ligjit.