Trajneri i Kombëtares shqiptare, Silvinjo, në konferencën zyrtare për shtyp një ditë para ndeshjes ndaj Serbisë, e cilësoi këtë përballje si më të rëndësishmen deri tani në fushatën e kuqezinjve.
“Të gjitha ndeshjet janë të rëndësishme, por kjo është më e rëndësishmja. Fituam me Letoninë dhe tani kjo ndeshje ka sens. Nëse fitojmë, me Andorrën do të jetë më e rëndësishmja. Janë ndeshje të ndryshme. Besoj se do të jetë një përballje e bukur,” deklaroi Silvinjo.
Trajneri brazilian tha se skuadra ka punuar intensivisht gjatë ditëve të fundit në Tiranë dhe është gati për një ndeshje që kërkon përqendrim maksimal.
“Siç e thashë, është një ndeshje e rëndësishme dhe e bukur. Për tre ditë e gjysmë kemi pasur stërvitje në Tiranë. Dje kemi zhvilluar një stërvitje të nivelit të lartë. Nesër do të duhet të zgjedhim lojtarët që do të hedhim në fushë,” u shpreh ai.
Në lidhje me mungesën e golave nga sulmuesit, Silvinjo u tregua i qetë dhe optimist, duke theksuar se ka besim të plotë tek skuadra.
“Mungesa e golit nuk më mungon nga sulmuesit. Goli është pika e fundit e futbollit. Kam besim që lojtarët do t’i përgjigjen atyre që kemi përgatitur në stërvitje,” vijoi trajneri i Kombëtares.
Silvinjo shtoi se stafi teknik është i informuar mbi mënyrën e lojës së kundërshtarit dhe se ekipi është përgatitur në detaje.
“Në fakt edhe ne e dimë ekipin e tyre. Luajnë me 3 qendërmbrojtës, 2 krahu, 3 mesfushorë dhe 2 sulmues. Nuk mund t’ju them për ndonjë surprizë, por kemi një stërvitje të rëndësishme që na pret pas pak,” përfundoi trajneri i kuqezinjve.