Kryetari i Lidhjes Demokratike të Kosovës (LDK), Lumir Abdixhiku, në një konferencë për media pas mbylljes së votimit, ka thënë se kjo ditë është fitore për të gjithë qytetarët e Republikës së Kosovës.
“Sonte me këtë proces dua të them se jemi fitues të gjithë qytetarët e Republikës së Kosovës”, u shpreh Abdixhiku.
Ai konfirmoi se, sipas rezultateve të deritanishme, LDK prin dhe është në garë në gjithsej 12 komuna.
“12 tetori është i 12 komunave të LDK-së,” shtoi ai.
Abdixhiku tha se LDK ka fituar në Istog, Lipjan dhe Junik në raund të parë, ndërsa shumë afër këtij rezultati është edhe kandidati për Pejë, Gazmend Muhaxheri, i cili sipas tij pritet të kalojë mbi 50 për qind me votat e diasporës.
Ai gjithashtu uroi Përparim Ramën, duke e quajtur fitues të garës për kryetar të Prishtinës.
“Sipas rezultateve, pas 12 vitesh, LDK kthehet si parti e parë në Prishtinë – si për kandidatin, ashtu edhe për kuvendin komunal,” deklaroi Abdixhiku.
Kreu i LDK-së shtoi se partia e tij po prin edhe në komunat Viti, Obiliq dhe Dragash, ndërsa është në balotazh në Fushë Kosovë, Suharekë, Gjilan dhe Rahovec.