Policia e Kosovës ka njoftuar se njësiti i komunikacionit rrugor në Ferizaj, gjatë realizimit të detyrave për kontrollin dhe mbikëqyrjen e trafikut rrugor, ka ndëshkuar dy shoferë të cilët kishin arritur kufirin maksimal të pikëve negative të lejuara me ligj.
Shoferi A.S. (26 vjeç) është ndëshkuar me masën mbrojtëse – ndalim i ngasjes së automjetit për 12 muaj, pasi për dy kundërvajtje të kryera në komunikacion kishte arritur gjithsej 10 pikë negative.
Ndërsa shoferi F.Z. (27 vjeç) është ndëshkuar me të njëjtën masë mbrojtëse – ndalim i ngasjes së automjetit për 12 muaj, pasi për pesë kundërvajtje të shkaktuara në komunikacion kishte arritur 9 pikë negative.