Dogana e Kosovës ka bërë të ditur se gjatë ditës së djeshme në operacionin ku u konfiskuan 250 kilogramë kanabis në Prishtinë ka qenë e përfshirë edhe Agjencia e Kosovës për Inteligjencë.
Në njoftimin e Doganës thuhet se ky operacion u zhvillua bazuar mbi inteligjencën e siguruar nga AKI-ja, njofton Dukagjini.
“Operacioni është realizuar gjatë orëve të pasdites, kur njësia e Antikontrabandës e Doganës ka ndalur për kontroll një kamion që po lëvizte në drejtim të Prishtinës në autostradën “Ibrahim Rugova”. Pas një inspektimi të detajuar, dhe duke përdorur pajisjet profesionale të dhuruara nga Ambasada e Shteteve të Bashkuara të Amerikës, zyrtarët doganorë kanë arritur të demontojnë panelet e fshehura të automjetit, ku ishin vendosur substancat narkotike”.
“Në vendngjarje kanë dalur edhe njësia antidrogë e Policisë së Kosovës dhe Prokurorja kompetente. Personi përgjegjës është arrestuar nga Policia e Kosovës, ndërsa procedurat ligjore janë në zhvillim”, thuhet në njoftimin e Doganës.