Pas një vonese ka filluar rinumërimi i fletëvotimeve në Qendrën Komunale të Mitrovicës së Jugut, i urdhëruar nga Prokuroria Themelore në Mitrovicë.
Ky proces është ndërmarrë pas identifikimit të një problemi teknik gjatë numërimit të mëparshëm.
Sipas njoftimit zyrtar të Prokurorisë, vendimi për rifillimin e numërimit është marrë pas sqarimeve nga kompania CETIS, përgjegjëse për printimin e fletëvotimeve, e cila kishte raportuar se defekti teknik ndodhi në njërën nga katër kokat e printerëve me ngjyrë, të cilat shtypnin numrat e qendrave të votimit. CETIS ka marrë përgjegjësinë e plotë për gabimin, duke theksuar se në rrethana normale një defekt i tillë është pothuajse i pamundur.
Për të garantuar transparencën dhe integritetin e procesit, Prokuroria ka caktuar dy hetues policorë, të cilët janë të pranishëm gjatë gjithë procesit të rinumërimit deri në përfundim të plotë të numërimit.
Prokuroria urdhëron rifillimin e numërimit të fletëvotimeve në Mitrovicën e Jugut