Ligjvënësit amerikanë kanë publikuar më shumë se 20,000 faqe dokumente nga pasuria e financierit të shquar dhe të ndjerë, Jeffrey Epstein, i dënuar më parë për keqpërdorim seksual.
Disa nga dokumentet përmendin emra të njohur si princi i mëparshëm Andrew Mountbatten Windsor, vëllai i Mbretit Charles, Presidenti i SHBA-së, Donald Trump, ish-këshilltari i Trump, Steve Bannon, si dhe figura të tjera nga bota e medias, politikës dhe argëtimit, duke treguar gjerësinë e rrjetit të kontakteve të Epstein.
Trump ka qenë mik i Epstein për vite, por vetë presidenti ka thënë se marrëdhënia e tyre është shkëputur rreth vitit 2004, shumë vite para arrestimit të parë të Epstein. Ai gjithmonë ka mohuar çdo keqbërje në lidhje me Epstein.
Emra të tjerë të përmendur në dokumente:
Michael Wolff, gazetari dhe shkrimtari amerikan, i njohur për librin “Fire and Fury” mbi administratën e parë të Trump. Dokumentet tregojnë një korrespondencë midis Wolff dhe Epstein ku diskutojnë Trump gjatë fushatës presidenciale 2015-2016. Wolff i kishte sugjeruar Epstein se si të vepronte për t’i shkaktuar dëm Trumpit. Ai ka thënë se kishte intervistuar Epstein “periodikisht” për librin e tij.
Larry Summers, ish-Sekretar i Thesarit në administratën e Presidentit Bill Clinton. Dokumentet tregojnë se Epstein dhe Summers kishin darka të shpeshta së bashku, ku Epstein përpiqej t’i lidhte Summers me figura globale. Në një email pas zgjedhjeve të vitit 2016, Summers kërkoi të mos lidhej më me Trump dhe Epstein për çështje të ndryshme politike.
Kathryn Ruemmler, avokate dhe këshilltare e Shtëpisë së Bardhë gjatë presidencës së Barack Obama. Në disa shkëmbime emailesh me Epstein, diskutohej për pagesa hush-money të bëra nga Trump ndaj yllit të filmave për të rritur, Stormy Daniels, para zgjedhjeve 2016. Ruemmler ka thënë më pas se i ka “përjetuar keq njohjen me Epstein”.
Peter Thiel, investitor miliarder dhe mbështetës i Trump. Dokumentet tregojnë se Epstein e kishte ftuar Thiel në ishullin e tij në Karaibe në vitin 2018, ku dyshohet se janë kryer disa nga krimet e tij. Thiel ka pohuar se nuk ka vizituar ndonjëherë ishullin dhe ka kritikuar më pas Epstein publikisht.
Noam Chomsky, linguist i njohur, kishte korrespondencë akademike dhe personale me Epstein, ku ndonjëherë diskutohej edhe Trump. Chomsky ka theksuar se nuk ka marrë asnjë përfitim financiar nga Epstein.
Peggy Siegal, publiciste, e cila u konsultua nga Epstein gjatë skandalit që lidhej me akuzat ndaj tij dhe personave të njohur. Epstein i kishte kërkuar Siegal të kontaktonte Ariana Huffington për të diskredituar akuzat e Virginia Giuffre, një nga viktimat kryesore. Siegal ka thënë se nuk e ka bërë këtë dhe e ka konsideruar kërkesën e Epstein “të çmendur”.
Dokumentet e publikuara nuk nënkuptojnë se personat e përmendur kanë kryer ndonjë keqbërje, ato tregojnë vetëm lidhjet ose korrespondencat që kanë pasur me Epstein./BBC