Ministria e Punëve të Jashtme dhe Diasporës ka reaguar lidhur me vjedhjen e targave të veturave me tabela kosovare në Lubjanë pas përfundimit të ndeshjes së futbollit Slloveni–Kosovë.
MPJD bën të ditur se Ambasada e Kosovës në Slloveni është në kontakt të vazhdueshëm me disa prej shtetasve të prekur dhe u ka rekomanduar atyre që të mos i lëvizin veturat pa njoftuar paraprakisht Policinë e Sllovenisë dhe pa marrë një raport zyrtar, njofton Dukagjini.
“Ambasada e Republikës së Kosovës në Slloveni njofton se menjëherë pas përfundimit të ndeshjes së futbollit Slloveni–Kosovë, ka pranuar disa thirrje telefonike nga shtetas të Republikës së Kosovës, të cilët kanë raportuar mungesën e targave të veturave të tyre. Bazuar në raportimet e deritanishme, dyshohet se disa veturave u janë hequr targat. Ambasada është në kontakt të vazhdueshëm me disa prej shtetasve të prekur dhe u ka rekomanduar atyre që të mos i lëvizin veturat pa njoftuar paraprakisht Policinë e Sllovenisë dhe pa marrë një raport zyrtar”, thuhet në njoftimin e MPJD-së.
Tutje bëhet e ditur se ambasada po merret me rastin dhe po bashkërendon veprimet me autoritetet përkatëse.