Presidenti amerikan, Donald Trump, ka lënë të kuptohet se bisedimet për paqe mes Ukrainës dhe Rusisë mund të kenë sjellë përparim.
“Është vërtet e mundur që të jetë bërë përparim i madh në bisedimet e paqes mes Rusisë dhe Ukrainës??? Mos e besoni derisa ta shihni, por diçka e mirë mund të jetë duke ndodhur. ZOTI E BEKOFTË AMERIKËN!”, ka shkruar ai në një postim në platformën e tij Truth Social.
Komentet e Trumpit erdhën pasi bisedimet në Gjenevë u përmbyllën dhe ndërsa liderët evropianë paralajmëruan se “ende mbetet punë për t’u bërë”.
Delegacioni ukrainas kthehet nga Gjeneva
Presidenti ukrainas, Volodymyr Zelensky, ka njoftuar në Telegram se delegacioni ukrainas është nisur për t’u kthyer në Kiev pas takimeve në Gjenevë.
Ai tha se pret një raport të plotë mbi ecurinë e negociatave gjatë mbrëmjes dhe se vendimet për hapat e ardhshëm do t’i marrë sapo të informohet nga ekipi negociator.
Zelensky ka paralajmëruar se Ukraina nuk duhet të pranojë dorëzim territori përballë presionit ndërkombëtar, raporton BBC.
Putin diskuton propozimin amerikan me Erdogan
Ndërkohë, presidenti rus Vladimir Putin ka diskutuar me presidentin turk, Recep Tayyip Erdogan, për propozimin amerikan për t’i dhënë fund luftës në Ukrainë.
Sipas Kremlinit, Putin ka deklaruar se plani i SHBA-së mund të shërbejë si bazë për një marrëveshje paqeje dhe ka riafirmuar “angazhimin e Rusisë për një zgjidhje politike dhe diplomatike të konfliktit”.
Erdogan i ka thënë Putinit se Turqia është e gatshme të mbështesë procesin e paqes dhe ka sugjeruar Stambollin si vend për negociatat e ardhshme.
“Askush nuk do ta mbështesë”, ushtarët ukrainas reagojnë ndaj planit të paqes të SHBA-së