Nënkryetarja e Lidhjes Demokratike të Kosovës, Hykmete Bajrami, ka kritikuar Qeverinë në detyrë për vendimin e vonuar për ndarjen e mjeteve për pagat e punëtorëve të Radio Televizionit të Kosovës (RTK).
Ajo e ka cilësuar këtë vendim si të vonuar dhe të inskenuar nga vetë ekzekutivi.
Në një postim në Facebook, Bajrami ka thënë se punëtorët e RTK-së u lanë pa paga për një muaj të tërë, duke u detyruar të hyjnë në protesta dhe greva. Sipas saj, në fund, Qeveria po paraqitet si shpëtimtare, ndërkohë që ajo i akuzon për krijim artificial të krizave.
Ajo akuzoi kryeministrin në detyrë, Albin Kurti, se krijon kriza me qëllim që më pas të shfaqet si shpëtimtar.
“I paskan nda mjetet për RTK. E kemi thënë prej ditës së parë: këta vetë janë prodhues të krizave. I lanë një muaj pa paga punëtorët e RTK-së, me protesta e greva dhe në fund jo Kuvendi po këta uzurpatorët e Qeverisë paskan gjetë zgjidhje, me 28 ditë vonesë. Albin Kurti me klikën e tij jeton duke shkaktuar kriza, duke i bë njerëzit me vuajtë, duke i mbajtur qytetarët të varur nga vendimet e tij, e pastaj me dalë si shpëtimtar, por ranë maskat”, ka shkruar Bajrami.
Ajo kërkoi gjithashtu që Qeveria të ndërpresë bllokadat dhe të gjejë zgjidhje edhe për Komunën e Prishtinës.
Bajrami paralajmëroi se qytetarët do të japin përgjigje më 28 dhjetor.
“28 dhjetori do të jetë dita kur do të merrni përgjigjen për krejt këtë keqtrajtim që po u bëni qytetarëve”, ka shkruar Bajrami.