Ashtu siç pritej, partia më e madhe e serbëve në Kosovë, Lista Serbe ka shfrytëzuar të drejtën e ankesës në Panelin për Ankesa dhe Parashtresa ndaj vendimit të djeshëm të KQZ-së.
Ky institucion me votat kundër të VV-së e abstenimet e 6 të tjerëve, nuk e certfikoi Listën Setbe për pjesëmarrje në zgjedhjet e 28 dhjetorit.
Në një konferencë për media, kryetari i Listës Serbe, Zlatan Elek, njoftoi për ankesën në PZAP dhe vendimin e KQZ-së e ka vlerësuar si antidemokratik dhe antiserb.
“…Lista Serbe është partia me raportin më të mirë financiar në vitet e fundit. Pavarësisht faktit se ne kemi të drejtë të marrim pjesë në zgjedhjet parlamentare, regjimi i Albin Kurtit dëshiron ta bëjë të pamundur për Listën Serbe dhe të drejtën e popullit serb për të zgjedhur përfaqësues legjitim”, ka deklaruar Zlatan Elek – kryetar i Listës Serbe.
Përkundër se KQZ nuk e certifikon, Lista Serbe betejën në të kaluarën e ka fituar pas ankesës në PZAP. Në dy raste ky institucion e ka anuluar vendimin e KQZ-së për moscertifikim.
Për të e pamundësuar certifikimin e kësaj partie, sipas juristëve nuk e ka fuqinë KQZ-ja por hallkat tjera të shtetit.
“E para duhet të ketë një bazë të fuqishme që e rregullon, si materien si procedurën për shpërbërjen e një subjekti politik, dhe në anën tjetër duhet të ketë një vendim gjykate në lidhje me një subjekt politik, nuk mundesh që në këtë mënyrë përmes KQZ-së të zgjedhjeve thjesht të thuhet se nuk certifikohet një subjekt i caktuar për të hyrë në garë, një veprim i tillë është haptazi në kundërshtim me Kushtetutën”, ka deklaruar Gzim Shala – IKD.
Lista Serbe nuk u certifikua fillimisht për pjesëmarrje as në zgjedhjet e përgjithshme të Shkurtit të këtij viti e pastaj edhe në ato lokale, por që të dyja vendimet u hodhën poshtë në shkallën e dytë./TVDUKAGJINI