Gurakuç Kuçi nga Instituti Octopus, ka reaguar ndaj veprimeve të fundit të Serbisë para zgjedhjeve në Kosovë, duke paralajmëruar përdorimin e skemave sociale për të blerë votat e votuesve serbë.
Sipas Kuçit, Serbia ka zgjedhur që të shpërndajë pagesa në kuadër të skemave sociale për të papunët që jetojnë në Kosovë, duke filluar nga data 20 nëntor, e shtunë, ditë që nuk punohet.
Këto pagesa, sipas tij, përdoren si mjet për të nxitur votimin për Listën Serbe, një praktikë e cila, sipas raportimeve të kaluara, përsëritet çdo herë para zgjedhjeve elektorale.
Ai ka theksuar se për shkak të festave të fundvitit, shpërndarja e fondeve bëhet edhe nëpërmjet organizatave të ndryshme, duke e maskuar si dhurata.
Po ashtu, sipas Kuçit, Serbia po organizon edhe serbët nga Kosova që jetojnë në Serbi dhe vende të tjera për të votuar më 28 dhjetor, përmes zyrave të posaçme dhe numrave telefonik aktiv.
Kuçi përmend gjithashtu Aktin e Autorizimit të Mbrojtjes Kombëtare të SHBA-së (NDAA), ku Serbia është vlerësuar si vend me kushte të padrejta zgjedhjesh dhe me gjendje shqetësuese të demokracisë.