Në mesnatën e Natës së Krishtlindjes, fjalët e himnit tradicional “Nata e Krishtlindjes” do të jehojnë sërish në shpellën e vogël të Kishës së Lindjes në Betlehem, e ndërtuar mbi vendin ku të krishterët besojnë se lindi Jezu Krishti.
“Në natën e Krishtlindjes varroset lufta, në natën e Krishtlindjes lind dashuria”, këndon çdo vit kori lokal gjatë meshës së mesnatës. Gjatë provave për shërbesën e këtij viti, shumë anëtarë të korit thanë se këto fjalë kanë marrë një kuptim edhe më të thellë pas armëpushimit në Gaza, shkruan AP, transmeton Dukagjini.
“Kjo na kujton se, pavarësisht vështirësive dhe errësirës, gjithmonë ka një dritë dhe shpresa mbetet e gjallë,” tha Joseph Hazboun, dirigjenti i korit laik të përbërë nga katolikë vendas.
Për dy vitet e fundit, ndërsa lufta në Gaza vazhdonte, Krishtlindjet në Betlehem ishin të zymta, pa festimet tradicionale, dekorimet dhe muzikën. Por këtë vit, familjet janë rikthyer në Sheshin e Grazhdit (Manger Square), duke sinjalizuar shpresë për armëpushimin e brishtë dhe duke sjellë një ndihmë të domosdoshme ekonomike për qytetin.
Gjatë një vizite të fundit, sheshi ishte i mbushur me njerëz, drita festive, treg Krishtlindjesh dhe shfaqje muzikore për fëmijë.
“Mund ta shohësh qytetin që po ringjallet,” tha Zoya Thalgia, banore e Betlehemit. “Të gjithë janë të lumtur, të gjithë kanë dalë për të festuar, pa dallim feje apo bindjesh.”
Lufta ka rënduar ekonominë dhe shpirtin e Betlehemit
Krishtlindjet dhe pelegrinazhet fetare kanë qenë gjithmonë motori kryesor ekonomik i Betlehemit. Sipas autoriteteve lokale, rreth 80% e banorëve të qytetit, i cili ka shumicë myslimane, varen nga bizneset e lidhura me turizmin. Në kohë të mira, të ardhurat përhapen edhe në komunitetet e tjera të Bregut Perëndimor, territor i pushtuar nga Izraeli që nga viti 1967 dhe që prej kohësh përballet me varfëri.
Por gjatë luftës në Gaza, papunësia në Betlehem u rrit nga 14% në 65%, deklaroi këtë muaj kryetari i bashkisë, Maher Nicola Canawati. Në vitet e kaluara, si akt proteste, disa kisha krijuan skena të Lindjes me foshnjën Jezus të rrethuar nga rrënoja dhe tela me gjemba.
Pavarësisht armëpushimit që nisi në tetor, tensionet mbeten të larta në Bregun Perëndimor. Ushtria izraelite ka deklaruar se po ndërmerr operacione të shpeshta kundër militantëve, ndërsa sulmet e kolonëve izraelitë ndaj palestinezëve kanë arritur nivelin më të lartë që nga viti 2006, sipas të dhënave të OKB-së.
Qëndresa e krishterimit në Tokën e Shenjtë
Odette Al Sliby, banore e Betlehemit, ka kënduar në kore që nga mosha shtatëvjeçare, por thotë se pak gjëra krahasohen me këndimin në shpellë gjatë meshës së mesnatës.
“Është një vend shumë i shenjtë, atmosfera, këngët dhe fjalët,” tha ajo. Sipas saj, këto këngë janë një mesazh shprese dhe një kujtesë për rëndësinë e qëndrueshmërisë. “Si të krishterë në Tokën e Shenjtë, prania jonë këtu ka një domethënie të madhe.”
Të krishterët përbëjnë më pak se 2% të rreth 3 milionë banorëve të Bregut Perëndimor, dhe kjo prani është në rënie.
Me rritjen e varfërisë dhe papunësisë gjatë luftës, rreth 4,000 persona kanë lënë Betlehemin në kërkim të punës, tha kryetari i bashkisë. Kjo është pjesë e një prirjeje shqetësuese për komunitetin e krishterë, i cili po largohet gjithnjë e më shumë nga rajoni.
Në të gjithë Lindjen e Mesme, popullsia e krishterë ka rënë vazhdimisht për shkak të konflikteve dhe sulmeve.
Hazboun tha se këtë Krishtlindje do të lutet që popullsia e krishterë në Betlehem dhe në vendet e tjera të rëndësishme për krishterimin të mos tkurret më tej.
Rikthimi i festimeve të Krishtlindjeve në gjithë Bregun Perëndimor, përfshirë një treg të madh në Ramallah, është një lehtësim i madh për fëmijët, shtoi ai.
Ndërsa palestinezët vazhdojnë të tronditen nga pamjet që vijnë nga Gaza, ndezja e pemës së Krishtlindjes në Sheshin e Grazhdit në Betlehem për herë të parë pas dy vitesh ka sjellë një ndjenjë gëzimi të shumëpritur.
“Ne vazhdojmë të lutemi për paqe. Kjo është toka e paqes, toka ku lindi Princi i Paqes, dhe ne vazhdojmë të shpresojmë se një ditë të gjithë do ta shijojmë paqen,” tha Hazboun.