Sipas raportit 24-orësh të Policia e Kosovës, gjatë ditës së shtunë janë raportuar tri raste të ndara të hetimit të vdekjes në Gjilan, Shtime dhe Leposaviq.
Rasti i parë ka ndodhur në Gjilan, më 20 dhjetor 2025 rreth orës 08:25, ku një mashkull është dërguar pa shenja jete në emergjencën e qytetit. Mjekët kanë konstatuar vdekjen e viktimës, ndërsa sipas dëshmitarëve ai kishte humbur ndjenjat dhe ishte rrëzuar në tokë derisa ndodhej në vendin e punës. Me urdhër të prokurorit, trupi i pajetë është dërguar në Instituti i Mjekësisë Ligjore për obduksion.
Rasti i dytë është raportuar në Shtime në orën 08:36. Nga Qendra Integruese Rehabilituese e të sëmurëve kronikë psikiatrikë është bërë e ditur se një paciente ka pësuar përkeqësim të gjendjes shëndetësore dhe si pasojë ka ndërruar jetë në Qendrën Kryesore të Mjekësisë Familjare. Për rastin është njoftuar prokurori kompetent, ndërsa trupi i pajetë është liruar për familjarët për ceremoninë mortore.
Ndërkaq, rasti i tretë ka ndodhur në Leposaviq, më 20 dhjetor 2025 rreth orës 18:40, ku një mashkull është gjetur pa shenja jete në banesën e tij. Vdekja është konstatuar nga mjeku, ndërsa sipas familjarëve, viktima jetonte i vetëm dhe nuk ishte përgjigjur në telefon. Njësitë policore dhe zjarrfikësit kanë dalë në vendin e ngjarjes, duke hapur me forcë derën e banesës. Me urdhër të prokurorit, trupi i pajetë është dërguar në Institutin e Mjekësisë Ligjore për obduksion.
Hetimet për të tri rastet janë në vazhdim.