Qyteti i San Francisko është përballur me një ndërprerje të gjerë të energjisë elektrike, duke lënë rreth 130 mijë banorë pa rrymë.
Ndërprerja ka prekur një pjesë të madhe të veriut të qytetit, përfshirë lagjet Richmond dhe Presidio, si dhe zonat përreth Parkut Golden Gate, duke nisur nga orët e para të pasdites dhe duke vazhduar edhe gjatë natës.
Departamenti i Menaxhimit të Emergjencave në San Francisko ka njoftuar në rrjetin X se janë regjistruar “ndërprerje të konsiderueshme të transportit publik” në gjithë qytetin, duke u bërë thirrje qytetarëve të shmangin udhëtimet e panevojshme dhe t’i trajtojnë semaforët jashtë funksionit si shenja ndalese.
Edhe kryebashkiaku i San Franciskos, Daniel Lurie, ka apeluar për kujdes, duke theksuar se kushtet atmosferike janë të pafavorshme. “Do të ketë shi. Është natë. Nëse nuk keni nevojë të dilni, qëndroni në shtëpi”, ka shkruar ai në X.
Sipas autoriteteve të zjarrfikësve, një pjesë e ndërprerjes së energjisë është shkaktuar nga një zjarr që shpërtheu brenda një nënstacioni të Pacific Gas & Electric Company në kryqëzimin e rrugëve 8th dhe Mission, rreth orës 15:15.