Një gjeneral i ushtrisë ruse është vrarë në Moskë si pasojë e shpërthimit të një bombe të vendosur në një makinë, kanë bërë të ditur autoritetet ruse.
Sipas Komitetit Hetimor të Rusisë, gjeneral-lejtnant Fanil Sarvarov (56) humbi jetën të hënën në mëngjes, pasi një mjet shpërthyes i vendosur nën automjetin e tij u detonua.
Sarvarov ishte shef i departamentit për trajnim operacional në Forcat e Armatosura të Rusisë. Hetuesit kanë konfirmuar se shpërthimi ndodhi në një parking pranë një blloku banesash në jug të kryeqytetit rus.
Një nga pistat që po hetohet është mundësia e përfshirjes së shërbimeve të inteligjencës së Ukrainës në vendosjen e bombës. Autoritetet ukrainase nuk kanë reaguar deri tani.
Pamjet nga vendi i ngjarjes tregojnë një makinë të bardhë të shkatërruar rëndë, me dyert e hedhura jashtë nga shpërthimi, e rrethuar nga automjete të tjera në parking.
Që nga nisja e pushtimit të plotë të Ukrainës nga Rusia në shkurt të vitit 2022, disa zyrtarë të lartë ushtarakë rusë janë shënjestruar në Moskë.
Në prill, gjenerali Yaroslav Moskalik u vra gjithashtu nga një bombë në makinë, ndërsa në dhjetor të vitit 2024, gjenerali Igor Kirillov humbi jetën nga një mjet shpërthyes i fshehur në një skuter, i aktivizuar nga distanca.
Më vonë, një burim ukrainas i kishte thënë BBC-së se Kirillov ishte vrarë nga shërbimi sekret ukrainas, por kjo nuk u konfirmua kurrë zyrtarisht. Ukraina, si politikë, nuk pranon publikisht përgjegjësi për sulme të tilla të synuara.