Agim Ismaili, ish-drejtori i Burgjeve, është paraqitur sërish këtë të martë pranë SPAK.
Ismaili po hetohej në kuadër të dosjes që lidhet me hakerimin e adresave të email-eve të prokurorëve të posaçëm, ndërsa gjatë ditës së sotme atij pritet t’i komunikohet zyrtarisht mbyllja e hetimeve.
Më herët, njoftimi për përfundimin e hetimit u është komunikuar edhe dy personave të arrestuar në këtë çështje, Arnold Rrokaj dhe Zambak Gjoni.
Ndaj Agim Ismailit janë zhvilluar hetime për veprat penale “përgjimi i paligjshëm i të dhënave kompjuterike”, “grupi i strukturuar kriminal” si dhe “kryerja e veprave penale nga organizata kriminale dhe grupi i strukturuar kriminal”.
SPAK ishte në shënjestër të një ndërhyrjeje të paligjshme më 12 mars, kur u tentua të depërtohej në adresat e email-eve të prokurorëve të posaçëm.
Sipas autoriteteve, nga kjo ngjarje nuk u arrit të cenohej sistemi i brendshëm i institucionit. Hetimet për këtë çështje tashmë janë drejt përfundimit.