Ministria e Mbrojtjes e Kosovës ka njoftuar se, ministri Armend Mehaj e ka takuar zëvendëssekretarin e Përgjithshëm të NATO-s, Mircea Geoana, i cili ishte i shoqëruar nga disa ambasadorë dhe pjesëtarë të KFOR-it.
Në njoftim thuhet se, ministri Mehaj e ka falënderuar përfaqësuesin e NATO-s për kontributin në sigurinë e Kosovës dhe qytetarëve të saj.
“Me këtë rast, Ministri Mehaj i shprehu Zv.Sekretarit Geoana falënderimin dhe mirënjohjen e lartë për kontributin e NATO-së dhe vendeve anëtare të saj në shërbim të sigurisë dhe zhvillimit të përgjithshëm të vendit, institucioneve dhe mirëqenies së qytetarëve tanë”, thuhet në njoftimin e Ministrisë së Mbrojtjes.
Gjithashtu, në njoftim thuhet se vizioni i Kosovës është që të jetë pjesë e NATO-s.
“Kosova bashkë me popullin e saj janë të mishëruar me vlerat euroatlantike dhe me vizionin e saj të qartë për t’u bashkuar në familjen e vendeve anëtare dhe partnere të NATO-s”, thuhet në njoftim.
Të enjten e shtatë korrikut, Kosova është vizituar nga një delegacion i lartë i Këshillit të Aleancës Veriatlantike (NATO).
Gjatë ditës, ky delegacion është takuar me presidenten e Kosovës, Vjosa Osmani. Ky takim ka qenë me “dyer të mbyllura”.
Ndryshe, kryeministri i Kosovës, Albin Kurti, në kuadër të vizitës në Shtetet e Bashkuara të Amerikës, ku ishte i ftuar si folës në World Affairs Forum, kishte kërkuar ndihmën e SHBA-ve, që Kosova të bëhet pjesë e Programit Partneriteti për Paqe të NATO-s, derisa të bëhet anëtare e plotë e Aleancës më të fuqishme ushtarake në botë.