Autoritetet finlandeze kanë arrestuar dy anëtarë të ekuipazhit të një anijeje mallrash në lidhje me dëmtimin e një kablli nënujor të telekomunikacionit në Gjirin e Finlandës, njoftoi policia të enjten. Ngjarja ndodhi më herët këtë javë në rrugën mes Helsinkit të Finlandës dhe Tallinnit të Estonisë.
Dëmtimi u zbulua të mërkurën herët në zonën ekskluzive ekonomike të Estonisë, shkruan AP, transmeton Dukagjini.
Kablli, i cili i përket ofruesit finlandez të telekomunikacionit Elisa, konsiderohet infrastrukturë kritike.
Policia e Helsinkit ka hapur një hetim për dëmtim të rëndë kriminal, tentativë për dëmtim të rëndë kriminal dhe ndërhyrje të rëndë në telekomunikacion. Përveç dy arrestimeve, dy anëtarë të tjerë të ekuipazhit janë ndaluar nga udhëtimi deri në përfundimin e hetimeve.
Autoritetet nuk kanë dhënë detaje për rangun, nacionalitetin ose të dhëna të tjera personale të anëtarëve të arrestuar të ekuipazhit.
Anija, me emrin Fitburg, është regjistruar në Shën Vincent dhe Grenadinat dhe po udhëtonte nga Rusia drejt Izraelit në kohën e incidentit. Ekuipazhi përbëhet nga 14 anëtarë, nga të cilët disa janë nga Rusia, Gjeorgjia, Azerbajxhani dhe Kazakistani, të gjithë të ndaluar aktualisht nga autoritetet finlandeze.
Policia ka theksuar se hetimet janë ende në zhvillim e sipër dhe do të ofrohen përditësime të mëtejshme sapo të ketë informacione të reja.