Policia ka njoftuar se ka arrestuar një burrë në Ferizaj për ngacmim seksual ndaj një gruaje.
Siç bëhet e ditur në raportin 24-orësh të Policisë, viktima dyshohet se është detyruar në mënyrë sistematike, në vende, lokacione dhe momente të ndryshme kohore, të shikojë materiale audio-vizuale me përmbajtje pornografike në telefonin e të dyshuarit.
Sipas raportit të Policisë, ai dyshohet gjithashtu se ka sulmuar edhe bashkëshorten e tij.
Gjatë intervistimit, ai ka mohuar të gjitha pretendimet e viktimës.
“Ferizaj / 17.01.2026-23:00. Është arrestuar i dyshuari m/k nën dyshimin se i njëjti ka kryer veprën e cekur ndaj viktimës f/k, të cilën dyshohet se sistematikisht, në vende-lokacione dhe momente të ndryshme kohore e ka detyruar që të shikoj materiale audio-vizuale me përmbajtje pornografike në telefonin e tij. I dyshuari po ashtu dyshohet se e ka sulmuar edhe bashkëshorten e tij femër kosovare. I dyshuari gjatë intervistimit ka mohuar pretendimet e viktimës, ndërsa pas intervistimit me vendim të prokurorit është dërguar në mbajtje”, thuhet në njoftimin policor.