Ministria e Punëve të Brendshme ka mirëpritur aksionin e përbashkët të Prokuroria Themelore në Prishtinë dhe Policia e Kosovës, i cili ka rezultuar me arrestimin e katër personave të dyshuar, dy prej të cilëve zyrtarë të kësaj ministrie.
Sipas njoftimit të MPB-së, ndaj të arrestuarve ekziston dyshimi i bazuar se kanë kryer veprat penale “keqpërdorim i detyrës zyrtare” dhe “marrje ryshfeti”.
Ministria e Punëve të Brendshme ka theksuar se nuk do të tolerojë asnjë formë të keqpërdorimit të detyrës zyrtare apo përfshirjes në veprimtari të paligjshme nga asnjë zyrtar i saj.
Sipas MPB-së, çdo veprim që bie ndesh me ligjin dhe standardet e integritetit institucional do të trajtohet me seriozitet maksimal dhe në bashkëpunim të plotë me organet e drejtësisë.
Në komunikatë thuhet se MPB mbetet e përkushtuar në luftën kundër korrupsionit dhe në forcimin e transparencës, llogaridhënies dhe sundimit të ligjit në të gjitha nivelet institucionale, duke garantuar se askush nuk do të jetë mbi ligjin.
Po ashtu, ministria ka bërë të ditur se do të vazhdojë bashkëpunimin e ngushtë me institucionet relevante për zbardhjen e plotë të rastit dhe për të siguruar që drejtësia të vihet në vend.