Policia e Kosovës ka gjetur 9 granata dore, 538 fishekë dhe 3 karikatorë për armë automatike në një shtëpi të braktisur në fshatin Rudar i Vogël, komuna e Zveçanit.
Rasti ka ndodhur sot, më 25 janar rreth orës 11:20, pasi qytetarët raportuan praninë e armëve dhe municionit në këtë lokacion.
“Më datë 25.01.2026, rreth orës 11:20, njësitë policore nga Drejtoria Rajonale e Policisë Mitrovicë Veri, pas pranimit të informacionit nga qytetarët se në një lokacion në fshatin Rudar i Vogël, komuna e Zveçanit, mund të gjendeshin armë dhe municion, menjëherë kanë dalë në vendin e ngjarjes”, thuhet nga Policia.
Njësitë policore kanë dalë menjëherë në vendin e ngjarjes, ndërsa njësia për trajtimin e mjeteve shpërthyese (EOD), ka neutralizuar në mënyrë të sigurt granatat dhe municionin.
Rasti po hetohet nga Prokuroria e Shtetit si “Mbajtje në pronësi, kontroll ose posedim të paautorizuar të armëve”. Nuk ka persona të arrestuar.
Policia falënderon qytetarët për bashkëpunimin dhe i fton që të raportojnë çdo rast të dyshuar në numrin 192.