Gjykata Kushtetuese e Kosovës ka dhënë aktgjykimin lidhur me zgjedhjen e Nenad Rashiqit si nënkryetar i Kuvendit, duke konstatuar se procedura nuk ka qenë në përputhje me paragrafin 4 të nenit 67 të Kushtetutës dhe nenin 12 të Rregullores së Kuvendit, pasi zgjedhja e Rashiqit nuk u bë si propozim i shumicës së deputetëve nga radhët e komunitetit serb.
Zgjedhja e Rashiqit erdhi pas 27 raundeve të votimeve ku kandidatët e propozuar nga Lista Serbe nuk morën votat e nevojshme, dhe Rashiqi, deputet i Partisë për Liri, Drejtësi dhe Mbijetesë, u mbështet nga LVV, LDK dhe deputetë të pakicave joserbe, ndërsa deputetët e Listës Serbe votuan kundër dhe ata të PDK-së abstenuan.
Në lidhje me këtë, në Debat Plus, analisti Sadri Ramabaja shprehu shqetësimin e tij për ndikimin e jashtëm në vend.
“Kam drojë legjitime të them se i ka dhënë veto bllokuese një force politike, që është instrument i Beogradit. Këtë do të duhej përmes filozofisë poltike ta shmangte… Beogradi mezi pret ta bllokojë procesin (e konsitutimit të Kuvendit) dhe ta bëj shtetin defunskional siç e ka mbajtur që një periudhë të gjatë, së paku në veri…”, ka thënë Ramabaja.