Presidenti ukrainas Volodymyr Zelensky tha të dielën se raundi i ardhshëm i bisedimeve trepalëshe të paqes SHBA-Ukrainë-Rusi do të mbahet në Emiratet e Bashkuara Arabe më 4 dhe 5 shkurt.
“Ekipi ynë negociator sapo ka dorëzuar raportin e tij,” tha Zelensky, duke bërë të ditura datat për raundin tjetër të takimeve në Abu Dhabi.
Ai shtoi se Ukraina është e gatshme për një dialog të thellë dhe synon të sigurojë që rezultatet e bisedimeve të çojnë drejt një përfundimi të denjë dhe të vërtetë të luftës.
Ky njoftim u bë pas deklaratave të përfaqësuesit presidencial amerikan, Steve Witkoff, i cili tha se takimet midis delegacioneve amerikane dhe ruse në Florida të shtunën ishin “produktive dhe konstruktive” në lidhje me luftën në Ukrainë. Ky takim ishte pjesë e përpjekjeve të vazhdueshme të presidentit Donald Trump për të dhënë fund pushtimit të plotë rus ndaj Ukrainës, i cili shënon këtë muaj përvjetorin e katërt.
Në delegacionin amerikan përfshiheshin Witkoff, Sekretari i Thesarit Scott Bessent, dhëndri i Trump, Jared Kushner, dhe këshilltari i lartë i Shtëpisë së Bardhë, Josh Gruenbaum.
Të shtunën, Zelensky theksoi se Kievi është “në kontakt të rregullt me palën amerikane” dhe po priste të merrte informacion mbi raundin e fundit të bisedimeve. “Ukraina është e gatshme të punojë në të gjitha formatet efektive. Ajo që ka rëndësi janë rezultatet. Dhe që takimet të ndodhin. Ne po mbështetemi në takimet javën e ardhshme dhe po përgatitemi për to”, shtoi presidenti.
Raundi i ardhshëm vjen pas një raundi historik negociatash që u mbajt muajin e kaluar në Emiratet e Bashkuara Arabe, që ishte hera e parë trepalëshe SHBA-Ukrainë-Rusi që nga fillimi i pushtimit të plotë rus në shkurt 2022.