Zëdhënësja e Bashkimit Evropian, Anita Hipper, është pyetur nga mediat nëse Miroslav Lajçak ka qenë i komprometuar ose nën ndikim të huaj gjatë punës si përfaqësues Special i BE-së për dialogun Kosovë-Serbi duke e lidhur me zhvillimet e fundit, pra përmendjen e tij në dosjen famëkeqe Epstein.
Ajo ka deklaruar se “dialogu mbetet i pa ndikuar nga këto zhvillime”, dhe se çështjet që lidhen me rrezikun e sigurisë ose kërcënimet janë përgjegjësi e autoriteteve kombëtare.
“Në lidhje me Lajçakun speficikisht, ai ka dhënë dorëheqje nga pozita e tij si këshilltar për siguri kombëtare i kryeministrit sllovak, gjithashtu shërbimet e tij bien në kompetencë të mandatit të kaluar dhe detyra e tij si Përfaqësues Special përfundoi vitin e kaluar dhe nuk i është vazhduar mandati. Kur bëhet fjalë rrezik sigurie ose kërcënime, këto janë gjithashtu përgjegjësi e autoriteteve kombëtare për t’u trajtuar sepse ato janë përgjegjëse për këtë”, ka deklaruar Hipper.
“Kur bëhet fjalë për dialogun, mbetet i pa ndikuar nga këto zhvillime. Dialogu është një proces i qëndrueshëm që nga 2011, që është në dorë të palëve dhe udhëhiqet nga Përfaqësuesja e Lartë ( e BE-së ) dhe në vazhdimësi i mbikëqyrur nga vendet anëtare”, ka thënë tutje ajo pasi u pyet konkretisht nëse Lajçak ishte nën ndikim të huaj gjatë aktiviteteve të tij si përfaqësues Special i BE-së.
Përveç shkëmbimit të mesazheve me Jeffrey Epstein që lidhen me femrat, për të cilat Lajçak së pari tha se “nuk ka pasur kurrë shkëmbime ku përmenden femrat” dhe më pas u pendua duke e cilësuar përfshirjen e tij si “naivitet i shtyrë nga egoizmi mashkullor”, ish-emisari i dialogut është përfshirë edhe në biseda ku ofrohet për të organizuar takime me zyrtarë të lartë rusë, përfshirë Ministrin e Jashtëm Sergey Lavrov.
Në një nga mesazhet, Lajçak është shprehur,“Unë e dua Lavrovin”.