Aleanca për Ardhmërinë e Kosovës ka kërkuar që Projektligji për Buxhetin e vitit 2026 të diskutohet para se të miratohet.
Shefi i grupit parlamentar të kësaj partie, Besnik Tahiri, deklaroi se nuk ka ndonjë urgjencë për miratimin e buxhetit, pasi të enjten ishte aprovuar vazhdimi i ndarjes buxhetore për funksionimin e institucioneve të shtetit, njofton Dukagjini.
Tahiri theksoi se buxheti është praktikisht i njëjtë me atë të vitit të kaluar, dhe ndryshimet janë vetëm në tekst.
“Nuk ka asnjë arsye për nxitim, sepse dje e miratuam vazhdimin e ndarjes buxhetore për funksionimin e shtetit të Kosovës. Si mund të presim që një deputet… duhet të ketë kohë për të analizuar buxhetin e Kosovës tabelë pas table, dhe unë kur e fillova këtë në zyrën time, pashë se kishte shumë për t’u diskutuar. Ky është buxheti i vitit të kaluar; ndryshimet janë vetëm në formë, ndërsa vijat kryesore buxhetore mbeten të njëjta”, u shpreh Tahiri.
Gjithashtu, Lidhja Demokratike e Kosovës dhe Partia Demokratike e Kosovës nuk e mbështetën idenë që buxheti të miratohet me procedurë të përshpejtuar.