Në ditën përmbyllëse të Konferencës së Sigurisë në Mynih, kryeministri i Kosovës, Albin Kurti, zhvilloi një takim me ministrin e Punëve të Jashtme të Norvegjisë, Espen Barth Eide.
Sipas njoftimit, temë diskutimi ishte thellimi i marrëdhënieve bilaterale dhe shqyrtimi i mundësive ekonomike që ofron marrëveshja e EFTA-s.
Po ashtu, palët diskutuan gjerësisht për sektorët me interes të përbashkët, duke përfshirë ekonominë, teknologjinë, energjinë, si dhe industrinë e minierave dhe mineraleve.
Gjatë bisedës, kryeministri prezantoi planet për projektet kapitale të këtij mandati, veçanërisht në infrastrukturë kritike, transport dhe sport, duke i cilësuar ato si mundësi të favorshme për investitorët e huaj.
“Kryeministri Kurti shprehu mirënjohjen për miqësinë, kontributin dhe mbështetjen e Norvegjisë ndaj Kosovës dhe mbështetjen e Norvegjisë për anëtarësimin e Kosovës në Këshillin e Evropës”, thuhet në njoftimin e Zyrës së Kryeministrit.