Kryeministri i vendit, Albin Kurti, ka falënderuar deputetët e Kuvendit të Kosovës për miratimin e buxhetit për vitin 2026 teksa tha se vërejtjet dhe kritikat e tyre do të mund të trajtohen së shpejti me rastin e rishikimit të tij.
Kurti vlerëson se miratimi i buxhetit është tejet i rëndësishëm për Kosovën dhe për qytetarët, njofton Dukagjini.
“Buxheti i miratuar sot, në vlerë prej rreth 4 miliardë euro, parasheh 867 milionë euro për komunat; përfshin pagën e 13-të për punëtorët e sektorit publik; përmban ndryshimin e nevojshëm që mundëson dyfishimin e shtesës për përvojën e punës nga 0.25 për qind në 0.50 për qind për 15 vitet e para; si dhe shtyrjen e afatit për zbatimin e shkallës progresive të tatimit në pronë, derisa të miratojmë Ligjin e ri për Tatimin në Pronë, në konsultim me komunat e vendit tonë”, ka shkruar Kurti.
Mes tjerash, Kurti ka thënë se me këtë buxhet do të rritet edhe mbështetja për barnat esenciale, sektorin privat dhe fusha të tjera.