Studentë në disa universitete në Iran kanë organizuar protesta kundër qeverisë, të parat në këtë përmasë që nga ndërhyrja e përgjakshme e autoriteteve ndaj demonstratave muajin e kaluar.
Një protestë u mbajt edhe në Universitetin Shahid Beheshti në kryeqytet, ndërsa tubime janë raportuar edhe në pjesën verilindore të vendit.
Studentët po ashtu po nderonin mijëra persona të vrarë gjatë protestave masive të janarit, shkruan BBC, transmeton Dukagjini.
Ndërkohë, Shtetet e Bashkuara kanë rritur praninë ushtarake pranë Iranit, ndërsa presidenti amerikan Donald Trump ka deklaruar se po shqyrton mundësinë e një sulmi të kufizuar ushtarak.
SHBA-ja dhe aleatët e saj evropianë dyshojnë se Irani po i afrohet zhvillimit të një arme bërthamore, diçka që Teherani e ka mohuar vazhdimisht.
Zyrtarë amerikanë dhe iranianë u takuan të martën në Zvicër dhe thanë se është arritur përparim në bisedimet që synojnë kufizimin e programit bërthamor iranian. Megjithatë, pavarësisht këtij progresi, Trump deklaroi se brenda rreth 10 ditësh do të dihet nëse do të arrihet një marrëveshje apo nëse SHBA do të ndërmarrë veprime ushtarake.
Presidenti amerikan ka shprehur edhe më herët mbështetje për protestuesit iranianë, duke lënë të kuptohet në një moment se “ndihma është rrugës”.
Pamjet e verifikuara tregojnë qindra protestues, shumë prej tyre me flamuj kombëtarë iranianë, duke marshuar paqësisht në kampusin e Universitetit Sharif në fillim të semestrit të ri. Turma brohoriste “vdekje diktatorit”, një referencë ndaj liderit suprem Ali Khamenei, si dhe slogane të tjera kundër qeverisë.
Në Mashhad, qyteti i dytë më i madh i Iranit në verilindje, studentët raportohet të kenë brohoritur: “Liri, liri” dhe “Studentë, ngrini zërin për të drejtat tuaja”.
Më vonë gjatë ditës u raportuan demonstrata edhe në vende të tjera, ndërsa u bënë thirrje për protesta të reja të dielën.
Nuk është ende e qartë nëse ka persona të arrestuar.
Protestat e muajit të kaluar nisën për shkak të pakënaqësive ekonomike dhe shpejt u shndërruan në lëvizjen më të madhe që nga Revolucioni Islamik i vitit 1979.
Autoritetet iraniane deklaruan muajin e kaluar se më shumë se 3,100 persona kanë humbur jetën, por sipas tyre shumica ishin pjesëtarë të forcave të sigurisë ose kalimtarë të sulmuar nga “trazues”.
Protestat e së shtunës vijnë në një kohë kur autoritetet iraniane po përgatiten për mundësinë e një konflikti me Shtetet e Bashkuara.
Ndërkohë, opozita iraniane po i bën thirrje presidentit Trump të realizojë kërcënimet për sulm, duke shpresuar në rrëzimin e shpejtë të qeverisë aktuale. Megjithatë, grupe të tjera opozitare kundërshtojnë ndërhyrjen nga jashtë.