Eugen Cakolli nga Instituti Demokratik i Kosovës ka reaguar lidhur me mënyrën e zhvillimit të takimeve për zgjedhjen e presidentit të ri.
Ai ka theksuar se procesi është i tërë kompetencë e Kuvendit dhe jo e Qeverisë.
Cakolli ka vlerësuar se takimet duhet të zhvillohen mes kryetarëve të partive parlamentare, pasi bëhet fjalë për një proces që kërkon marrëveshje politike ndërmjet forcave parlamentare.
“Prandaj është pak e ‘çuditshme’ që takimet për këtë temë të mbahen në zyrën e Kryeministrit, sikur të ishte proces i Qeverisë. Takimet për çështjen e Presidentit duhet të zhvillohen mes kryetarëve të partive parlamentare, sepse ky është proces parlamentar dhe kërkon marrëveshje politike mes forcave parlamentare. Rrjedhimisht, nuk bëhet fjalë për raport Kryeministër-opozitë, e aq më pak Kryeministër-deputetë”, ka shkruar Cakolli në Facebook.
Ai ka shtuar se, për shkak se zgjedhja kërkon konsensus të gjerë parlamentar prej dy të tretave të votave në dy raundet e para, koha tashmë është vendimtare.
“Pikërisht për shkak se kërkohet konsensus i gjerë parlamentar prej 2/3 (të paktën në dy raundet e para), koha tashmë është vendimtare. Më së largu deri më 5 mars duhet të arrihet marrëveshje politike dhe të votohet suksesshëm Presidenti; në të kundërtën, hyjmë në një situatë të shkeljes kushtetuese që praktikisht e çon vendin drejt zgjedhjeve të reja parlamentare”, ka shkruar tutje.