Paketa e re e sanksioneve e Bashkimit Evropian ndaj Rusisë, e 20-ta me radhë, nuk do të miratohet para përvjetorit të katërt të pushtimit të plotë të Ukrainës, pasi Hungaria vazhdon ta bllokojë këtë paketë.
Kryediplomatja e BE-së, Kaja Kallas, pranoi se nuk pritet përparim sot për këtë çështje, duke shtuar se Ungaria ka bërë “deklarata shumë të forta” dhe nuk ka gjasa të ndryshojë qëndrimin e saj, raporton The Guardian.
Hungaria kundërshton masat e propozuara, si dhe pagesën e huasë prej 90 miliardë eurosh për Ukrainën, si pjesë e mosmarrëveshjes së saj me Kievin për transitin e naftës përmes tubacionit Druzhba. Ministri i Jashtëm hungarez, Peter Szijjarto, deklaroi se “deri sa Ukraina të rifillojë transitin e naftës për Hungarinë dhe Sllovakinë, nuk do të lejojmë të avancojnë vendimet e rëndësishme për Kievin.”
Situata ndodh vetëm gjashtë javë para zgjedhjeve parlamentare në Hungari, ku kryeministri pro-rus, Viktor Orbán, mund të përfundojë në opozitë pas 16 vitesh në pushtet. Orbán po përdor retorikë anti-ukrainase për të akuzuar, pa bazë, një komplot midis Kievit dhe Brukselit dhe për të paralajmëruar rrezikun e zgjerimit të luftës drejt Hungarisë.
Mosmarrëveshja për paketën e sanksioneve mund të jetë një turp politik për BE-në, ndërkohë që udhëheqësit e saj, përfshirë presidenten e Komisionit Ursula von der Leyen, planifikojnë të udhëtojnë në Kiev të martën për përvjetorin.
Polonia kritikoi ashpër Hungarinë. Ministri i Jashtëm polak, Radosław Sikorski, e quajti “shokues” vendimin e Budapestit për të sulmuar Ukrainën për përfitime të brendshme, duke kujtuar historinë e Hungarisë kundër agresionit sovjetik.