Meksika ka dërguar mijëra ushtarë për të forcuar sigurinë pas një vale dhune që shpërtheu pas vdekjes së një prej drogëbossëve më të kërkuar në vend.
Sekretari i Mbrojtjes, Ricardo Trevilla, tha se të hënën u dërguan 2,500 ushtarë shtesë në perëndim të Meksikës, duke e çuar në rreth 9,500 numrin total të trupave të dërguar që nga e diela.
Të paktën 20 shtete kanë regjistruar trazira që kur Nemesio Oseguera Cervantes – i njohur si “El Mencho” – vdiq në paraburgim, pak pas kapjes së tij nga forcat speciale në shtetin Jalisco. Karteli i Ri i Gjeneratës së Jalisco-s (CJNG), i drejtuar nga El Mencho, konsiderohet një nga organizatat kriminale më të frikshme në vend.
Sipas ministrit të Sigurisë, të paktën 25 anëtarë të Gardës Kombëtare të Meksikës kanë humbur jetën në Jalisco që nga shpërthimi i dhunës.
El Mencho u kap pasi forcat e sigurisë e ndoqën te një partner i tij romantik që po takonte. Drogëbossi u plagos rëndë në një shkëmbim zjarri mes truprojave të tij dhe komandove ushtarake, dhe ndërroi jetë gjatë transportimit nga qyteti Tapalpa drejt Meksiko Sitit.
Në operacion humbën jetën edhe gjashtë truprojat e tij, ndërsa tre anëtarë të ushtrisë u plagosën. Ndërkohë, një roje burgu, një anëtar i zyrës së prokurorit dhe 30 persona të tjerë të CJNG-së kanë humbur jetën gjatë trazirave pas vdekjes së El Mencho, sipas sekretarit të Sigurisë Omar Garcia Harfuch.
Presidentja e Meksikës, Claudia Sheinbaum, ka lavdëruar operacionin e ushtrisë që çoi në vdekjen e drogëbossit dhe tha se prioriteti i saj mbetet garantimi i paqes dhe sigurisë në të gjithë vendin.
Si pasojë e lajmit për vdekjen e tij, anëtarët e kartelit nisën sulme në shumë qytete dhe fshatra ku CJNG është aktiv. Ata bllokuan rrugë duke hedhur gozhda dhe thumba, ndërsa në disa vende morën autobusa dhe automjete të tjera dhe i dogjën. Disa banka dhe biznese lokale u dëmtuan nga zjarrvëniet.
Video të verifikuara nga BBC tregojnë turistë duke parë nga pishina ndërsa një helikopter ushtarak fluturon afër hotelit të tyre dhe tym ngrihet nga ndërtesat në qytetin Puerto Vallarta.
Video të tjera tregojnë përplasje mes anëtarëve të kartelit dhe Gardës Kombëtare në San Isidro, pranë Guadalajarës, kryeqytetit të Jalisco-s.