Lord Peter Mandelson është arrestuar të hënën nga Policia Metropolitane e Londrës, nën dyshimin e keqpërdorimit të detyrës publike. Burimet policore thanë se 72-vjeçari u ndalua në një adresë në Camden, veri i Londrës, dhe u dërgua në stacion policor për intervistim.
Arrestimi vjen pas urdhrave për kontroll në dy adresa në Wiltshire dhe Camden, si pjesë e hetimeve për pretendimet se gjatë kohës si ministër qeveritar, Lord Mandelson kishte ndarë informacione të ndjeshme për tregun me të ndjerin Jeffrey Epstein, i dënuar më parë për abuzim seksual ndaj fëmijëve.
BBC raporton se Lord Mandelson nuk ka komentuar publikisht në lidhje me dosjet e Epstein, por burime pranë tij thonë se ai beson se nuk ka kryer ndonjë veprim kriminal dhe nuk ka pasur motiv financiar.
Hetimet filluan pas publikimit nga Departamenti i Drejtësisë së SHBA-së të disa dokumenteve, që përfshinin edhe emailet midis Mandelson dhe Epstein. Një email i vitit 2009 duket se tregon se ai ka ndarë me Epstein një vlerësim të një këshilltari të kryeministrit të atëhershëm Gordon Brown mbi politika financiare, duke përfshirë edhe një “plan për shitjen e aseteve”.
Lord Mandelson shërbeu si ambasador i Britanisë në SHBA nga shkurti 2025 deri në shtator të të njëjtit vit, kur u shkarkua pas zbulimeve të reja mbi marrëdhënien e tij me Epstein. Qeveria britanike planifikon të publikojë dokumentet e para lidhur me emërimin e tij në fillim të marsit, por policia po shqyrton se cilat mund të bëhen publike.
Kryetarja e konservatorëve, Kemi Badenoch, e konsideroi arrestimin e Mandelson si “momentin përcaktues të kryeministrit Sir Keir Starmer”, duke e kritikuar kryeministrin për dobësi në këtë çështje.
Lord Mandelson është gjithashtu i kërkuar nga politikanë amerikanë për t’u përgjigjur në hetimin e Kongresit lidhur me Epstein. Ai ka luajtur një rol të rëndësishëm në lëvizjen New Labour dhe në fitoren e madhe zgjedhore të Sir Tony Blair në vitin 1997.