Pas shumë vitesh pritjeje, familjarët e Masar Dushit, i cili u zhduk gjatë masakrës së Kralanit në vitin 1999, kanë njoftuar se e kanë identifikuar trupin e tij.
Ai ishte vetëm 23 vjeç kur u ndalua nga forcat serbe dhe për 27 vite konsiderohej i zhdukur, raporton Dukagjini.
Varrimi i Dushit do të bëhet nesër në Klinë, nga ora 14:00, ndërsa më parë do të organizohen homazhe në nder të tij.
“Me dhimbje të thellë dhe zemër të thyer ju njoftojmë se pas shumë vitesh pritjeje, dhimbjeje dhe shprese, është gjetur dhe identifikuar trupi i dajës Masar (Imer) Dushi, i zhdukur gjatë luftës në Kralan. Plaga e mungesës së tij ishte e hapur për vite me radhë, por kujtimi dhe krenaria për të nuk u shuan kurrë. Varrimi do të bëhet me 27.02.2026 në ora 14:00 në varrezat e Dëshmorëve në Grabanicë të Klinës. Homazhet mbahen në ora 11:00 në ‘Jehona e Dukagjinit’ në Klinë në prani të familjarëve dhe miqve, për t’i dhënë lamtumirën e fundit dhe për ta përjetësuar emrin e tij në historinë dhe zemrat tona”, thuhet në njoftimin e familjes.