Zyrtarë të Shteteve të Bashkuara të Amerikës dhe Iranit kanë bërë “përparim të rëndësishëm” në bisedimet për programin bërthamor iranian, të zhvilluara në Gjenevë, ndërsa mbetet e paqartë nëse do të arrihet një marrëveshje që do të shmangte një konflikt të mundshëm ushtarak.
Ministri i Jashtëm i Omanit, Badr Albusaidi, i cili ndërmjetësoi takimin, tha se negociatat do të rifillojnë “së shpejti” pas konsultimeve në kryeqytetet përkatëse, ndërsa javën e ardhshme do të zhvillohen diskutime në nivel teknik në Vjenë, shkruan BBC.
Delegacionin iranian e udhëhoqi ministri i Jashtëm Abbas Araghchi, i cili deklaroi se është arritur “progres i mirë”, ndonëse disa çështje mbeten ende të hapura.
Ai theksoi se raundi i ardhshëm i negociatave pritet të mbahet brenda më pak se një jave.
Nga ana amerikane, në bisedime morën pjesë i dërguari special Steve Witkoff dhe dhëndri i presidentit amerikan, Jared Kushner. I pranishëm ishte edhe kreu i Agjencisë Ndërkombëtare për Energjinë Atomike, Rafael Grossi.
Presidenti amerikan Donald Trump ka kërcënuar vazhdimisht me sulme ndaj Iranit, duke urdhëruar një grumbullim të madh forcash ushtarake amerikane në Lindjen e Mesme, përfshirë aeroplanmbajtëse dhe avionë luftarakë.
Irani ka paralajmëruar se do të përgjigjet me forcë në rast të një sulmi.
Për dekada, SHBA-ja dhe Izraeli e kanë akuzuar Iranin për përpjekje për zhvillimin e fshehtë të armëve bërthamore, akuza që Teherani i ka mohuar vazhdimisht, duke këmbëngulur se programi i tij është për qëllime paqësore. Megjithatë, Irani mbetet i vetmi shtet pa armë bërthamore që ka pasuruar uranium në nivele pranë atyre të nevojshme për armë.
Sipas mediave shtetërore iraniane, negociatorët kanë refuzuar kërkesën e SHBA-së për ndalimin e plotë të pasurimit të uraniumit në territorin iranian dhe transferimin jashtë vendit të rezervës prej rreth 400 kilogramësh uraniumi të pasuruar. Megjithatë, raportohet se janë ofruar disa kompromise, përfshirë mundësinë e pezullimit të përkohshëm të pasurimit për tre deri në pesë vjet, nën mbikëqyrje ndërkombëtare.
Në këmbim të një marrëveshjeje, Teherani kërkon heqjen e sanksioneve ekonomike që kanë goditur rëndë ekonominë e vendit. Kritikët e regjimit iranian paralajmërojnë se çdo lehtësim sanksionesh mund t’i japë frymëmarrje udhëheqjes aktuale.
Raportet në mediat amerikane raportojnë se Trump po shqyrton mundësinë e një sulmi fillestar ndaj objektivave të Gardës Revolucionare ose objekteve bërthamore iraniane për të rritur presionin, nëse negociatat dështojnë. Në skenarin më ekstrem, përmendet edhe mundësia e një fushate për rrëzimin e Udhëheqësit Suprem të Iranit, Ali Khamenei.
Ndërkohë, kryeministri izraelit Benjamin Netanyahu ka paralajmëruar kundër një marrëveshjeje që nuk përfshin kufizime mbi programin e raketave balistike të Iranit dhe mbështetjen e tij për grupet aleate në rajon.