Presidenti i SHBA-së, Donald Trump, ka deklaruar se nuk është i kënaqur me Iranin pas bisedimeve të fundit mbi programin bërthamor, por shtoi se ende nuk ka vendosur nëse do të ndërmarrë veprime ushtarake.
“Nuk jam i kënaqur që ata nuk janë të gatshëm të na japin atë që kemi nevojë. Pra, nuk jam i entuziazmuar,” tha Trump pas negociatave në Gjenevë, të cilat përfunduan të enjten pa marrëveshje, shkruan BBC, transmeton Dukagjini.
Trump theksoi se nuk dëshiron të përdorë forcën ushtarake kundër Iranit, por shtoi se ndonjëherë “duhet të veprosh”.
Si pasojë e shqetësimeve për një sulm të mundshëm amerikan ndaj Iranit, disa vende dhanë paralajmërime për qytetarët e tyre në rajon. Britania e Madhe tërhoqi përkohësisht stafin e saj nga ambasada në Teheran dhe përditësoi udhëzimet për udhëtime, duke këshilluar kundër çdo udhëtimi jo thelbësor drejt Izraelit.
Vende si Kina, India dhe Kanada i këshilluan qytetarët e tyre të largohen sa më shpejt nga Irani për shkak të rrezikut të konflikteve. Gjermania këshilloi urgjentisht kundër udhëtimeve drejt Izraelit, ndërsa Franca ripërsëriti paralajmërimin e saj të ngjashëm.
Ndërkohë, ambasada amerikane në Izrael i tha disa pjesëtarëve të stafit jo-emergjent dhe familjeve të tyre se mund të largohen nga vendi, duke sugjeruar që ta bëjnë këtë “sa kohë janë ende në dispozicion fluturime komerciale”.
Trump ka kërcënuar me veprime ushtarake ndaj Teheranit nëse nuk arrihet një marrëveshje për ambiciet bërthamore të Iranit. Ai ka urdhëruar rritjen më të madhe të forcave amerikane në Lindjen e Mesme që nga pushtimi i Irakut në 2003, ndërsa Irani ka premtuar të përgjigjet me forcë ndaj çdo sulmi.
Zyrtarë amerikanë dhe iranianë raportuan “progres të rëndësishëm” gjatë bisedimeve indirekte bërthamore në Gjenevë, sipas ministrit të Jashtëm të Omanit, por shanset për një marrëveshje që mund të shmangë një luftë mbeten të pasigurta.
Iranit i është lejuar të zhvillojë disa diskutime teknike javën e ardhshme në Vjenë, ndërsa ministri i Jashtëm iranian, Abbas Araghchi, deklaroi se është bërë “progres i mirë”, megjithëse ende ekzistojnë dallime në disa çështje.
Sekretari amerikan i Shtetit, Marco Rubio, pritet të vizitojë Izraelin të hënën, ku do të takohet me Kryeministrin Benjamin Netanyahu për të diskutuar “prioritetet rajonale”, përfshirë edhe Iranin.
Zëvendëspresidenti amerikan JD Vance ka thënë se sulmet mbeten të mundshme, por ka përjashtuar përfshirjen e SHBA-së në një luftë të gjatë.
SHBA-ja ka dërguar mijëra trupa dhe një “armadë” të pajisjeve ushtarake në rajon gjatë javëve të fundit, përfshirë dy aeroplanmbajtëse, avionë luftarakë dhe pajisje mbështetëse.
Irani këmbëngul se programi i tij bërthamor është vetëm për qëllime paqësore, megjithatë ka pasur aktivitet të pasurimit të uraniumit pranë niveleve të armëve. Agjencia Ndërkombëtare e Energjisë Atomike raportoi se nuk ka pasur qasje në këto objekte bërthamore dhe kërkon inspektime të menjëhershme.