Presidenti amerikan, Donald Trump, ka paralajmëruar Iranin që të mos ndërmarrë sulme hakmarrëse ndaj Shteteve të Bashkuara të Amerikës dhe Izraelit.
Trump, përmes një postimi, bëri të ditur se Irani ka deklaruar se do t’i godasë për çka u shpreh se kundërpërgjigja do të jetë me një forcë që s’është parë kurrë më herët, shkruan BBC, transmeton Dukagjini.
“Irani sapo deklaroi se do të godasë shumë fort sot, më fort se kurrë më parë. Ata më mirë të mos e bëjnë këtë sepse nëse e bëjnë, ne do t’i godasim me një forcë që nuk është parë kurrë më parë”, shkroi Trump në Truth.
Deklarata e tij vjen pasi Garda Revolucionare Islamike paralajmëroi se do të sulmonte bazat amerikane dhe Izraelin në shenjë hakmarrjeje për vdekjen e Khameneit.
“Operacioni më shkatërrues ofensiv në historinë e forcave të armatosura të Republikës Islamike të Iranit do të nisë drejt territoreve të pushtuara dhe bazave terroriste amerikane brenda pak çastesh”, thuhej në deklaratë.