Kryetarja e Kuvendit të Kosovës, Albulena Haxhiu, ka deklaruar se Grupi Parlamentar i Lëvizjes Vetëvendosje do ta dërgojë në Gjykatën Kushtetuese lëndën që lidhet me dekretin e presidentes për shpërndarjen e Kuvendit, të cilin ajo e konsideron jokushtetues.
Haxhiu tha se pret që Gjykata Kushtetuese të veprojë me shpejtësi për shkak të ndjeshmërisë së çështjes dhe të marrë fillimisht një masë të përkohshme, duke paralajmëruar se pasojat mund të jenë të pariparueshme nëse situata nuk trajtohet në kohë.
Kryetarja e Kuvendit shtoi se vendimi i presidentes Vjosa Osmani për shpërndarjen e Kuvendit ishte një befasi për të dhe, sipas saj, është një vendim i ngutshëm dhe në kundërshtim me Kushtetutën.
“Sa i përket çështjes për të cilën jeni të interesuar tashmë pritet që grupi parlamentar i Vetëvendosjes ta dërgojë në Gjykatën Kushtetuese lëndën që ndërlidhet me dekretin jokushtetues të presidentes Osmani. Pres që Gjykata Kushtetuese të veprojë në përputhje me ndjeshmërinë e çështjes dhe të marrë shpejt së pari masën e përkohshme sepse pasojat do të jenë të pariparueshme, prandaj le ta presim vendimin e Gjykatës Kushtetuese në raport me situatën aktuale”, ka thënë Osmani
Sipas Haxhiut, Kushtetuta e Kosovës përcakton qartë rrethanat kur mund të shpërndahet Kuvendi dhe, sipas interpretimit të saj, ato rrethana nuk janë përmbushur në situatën aktuale.
Ajo theksoi se, sipas Kushtetutës, vendi mund të shkojë në zgjedhje në dy raste: nëse brenda 60 ditëve nuk zgjidhet presidenti ose nëse në raundin e tretë asnjë kandidat nuk arrin të marrë votat e nevojshme për t’u zgjedhur. Sipas saj, asnjëra nga këto rrethana nuk ka ndodhur.
“Nëse ka dekret për shpërndarje të kuvendit, kuvendi nuk mund të vazhdojë punën. Nëse Gjykata Kushtetuese do të marrë masë të përkohshme natyrisht që rrethanat do të ndryshojnë. Siç e dini ne kemi shumë punë për të bërë. Kuvendi është konstituuar në një kohë shumë të shpejtë pas certifikimit të rezultateve, kemi arritur që të votojmë marrëveshje ndërkombëtare shumë të rëndësishme, shumë marrëveshje ndërkombëtare të tjera na presin nëse kuvendi do të vazhdojë punën. Kemi arritur që të votojmë buxhetin për vitin 2026.
Vendimi i presidentes për të shpërndarë kuvendin për mua ka qenë befasi sepse është jokushtetues, është i ngutshëm dhe natyrisht që si të tillë do ta kundërshtoj edhe si kryetare e kuvendit. Ju e dini që Kushtetuta e Republikës së Kosovës parasheh rrethanat se kur shpërndahet Kuvendi i Republikës së Kosovës, prandaj në këtë aspekt nuk ka asnjë rrethanë që i jep të drejtën presidentes që pa kaluar afati 60 ditor dhe pa dështuar në zgjedhjen e presidentit të vendit ta shpërndajë Kuvendin e Republikës së Kosovës. Presidenca nuk është mbi Kuvendin e Kosovës prandaj mendoj që këtij vendimi nuk duhet t’i gëzohej asnjë deputet i Kuvendit të Republikës së Kosovës sepse realisht është minim i punës së kuvendit dhe minim i institucionit të Kuvendit të Republikës së Kosovës”, tha ajo.
Haxhiu bëri thirrje që Gjykata Kushtetuese e Kosovës ta trajtojë këtë çështje me vigjilencë, profesionalizëm dhe shpejtësi, duke shtuar se është e rëndësishme që gjykata të veprojë pa presione dhe të marrë një vendim sa më të shpejtë për situatën aktuale.
“Në secilën paraqitje që unë kam pasur, përfshirë edhe të tjerë të cilët unë i kam dëgjuar (ka pasur raste të cilat unë nuk kam arritur që t’i dëgjoj), ne kemi thënë që janë dy rrethana kur vendi shkon në zgjedhje. Në rastin e presidentit e para kur kalojnë 60 ditë, dhe ky nuk është rasti sepse nuk janë përmbushur 60 ditë, ne vetëm sa kemi nisur procedurat sepse kushtetuta i përmend nisjen e procedurave për zgjedhjen e presidentit. Dhe në anën tjetër kur në raundin e tretë asnjëri kandidat nuk arrin që të marrë votat për t’u bërë president. Pra nuk ka një rrethanë siç e kemi pasur ne”, tha ajo.
Sipas saj, si kryetare e Kuvendit do të ishte dashur të konsultohej paraprakisht për një çështje kaq të rëndësishme institucionale.
Në fund, Haxhiu tha se mbetet të pritet vendimi i Gjykatës Kushtetuese për të sqaruar situatën, duke shtuar se zhvillimet e ardhshme do të tregojnë drejtimin e procesit politik në vend.