Më shumë se 43 mijë shtetas amerikanë janë kthyer në Shtetet e Bashkuara nga Lindja e Mesme që nga fillimi i konfliktit me Iranin më 28 shkurt, ka bërë të ditur një zëdhënës i Departamentit të Shtetit të SHBA-së.
Zëdhënësi Tommy Pigott tha se departamenti ka asistuar 30 mijë prej tyre përmes një task-force të krijuar posaçërisht për këtë qëllim, shkruan BBC, transmeton Dukagjini.
Shtetet e Bashkuara kanë realizuar më shumë se dy duzina fluturime çarter për të ndihmuar amerikanët të evakuohen nga rajoni, megjithëse këto fluturime kanë operuar mesatarisht me më pak se 40% të kapacitetit, pasi shumë amerikanë kanë zgjedhur të udhëtojnë me linja komerciale.
Fluturimet çarter dhe operacionet e transportit tokësor për largimin nga Lindja e Mesme vazhdojnë të zhvillohen.
Çdo shtetas amerikan mund të kërkojë ndihmë, sipas DASH-it.