Kryetari i Partisë Demokratike të Kosovës, Bedri Hamza, ka përkujtuar sot 27-vjetorin e ndërhyrjes së NATO-s në Kosovë, duke vlerësuar rolin vendimtar të Aleancës Veriatlantike në ndalimin e masakrave dhe krimeve sistematike të regjimit të Millosheviqit ndaj shqiptarëve.
Në një postim në Facebook, Hamza tha se bombardimet e NATO-s u koordinuan me UÇK-në dhe krerët e saj – Hashim Thaçin, Kadri Veselin, Jakup Krasniqin dhe Rexhep Selimin – të cilët sot po gjykohen në Hagë “dhe po trajtohen sikur të mos kishte ekzistuar arsyeja për ndërhyrjen e NATO-s”.
“Bombardimet e NATO-s u koordinuan edhe me UÇK-në, me Hashim Thaçin, Kadri Veselin, Jakup Krasniqin, Rexhep Selimin dhe bashkëluftëtarët e tyre, aleatët tokësorë të NATO-s, të cilët sot po gjykohen në Hagë dhe po trajtohen sikur të mos kishte ekzistuar arsyeja për ndërhyrjen e Aleancës Veriatlantike”, ka shkruar ai.
Ai ka shtuar se mirënjohja ndaj NATO-s është e përjetshme, sepse ato ditë vendosën fatin e Kosovës dhe shënuan rrugën drejt lirisë.