Visar Azemi nga Lidhja Demokratike e Kosovës (LDK), ka mbajtur një konferencë për media para objektit të KEDS-it dhe KESCO-s, ku ka akuzuar për manipulim të të dhënave dhe për përfitime të paligjshme nga qytetarët përmes njehsorëve elektrikë.
Ai ka deklaruar se kanë dëshmi të mjaftueshme që, sipas tij, tregojnë se kanë manipuluar dhe vjedhur qytetarët me njehsorë elektrikë.
Azemi ka paralajmëruar se do të kërkojë takim me menaxhmentin e KEDS-it për të paraqitur faktet që, sipas tij, dëshmojnë shkelje dhe mund të përbëjnë vepër penale.
Azemi po ashtu ka kritikuar edhe ZRrE, duke thënë se nuk e ka monitoruar siç duhet zbatimin e vendimeve për tarifat e energjisë elektrike dhe se duhet të mbajë përgjegjësi institucionale.
“Dua t’i dorëzojë këto dëshmi dhe t’ju tregoj që faktet nuk rrejnë, këta po rrejnë sepse kanë inkasu të hyra, mjete financiare paligjshëm ndaj qytetarëve të Kosovës, dhe kanë dalë kanë thënë që po manipulohen të dhënat. Nuk po manipulohen të dhënat. Tash do të hy dhe do të kërkojmë takim me menaxhmentin e KEDS-it edhe me iu shpjegu me iu dhënë këto fakte, pra kjo është vepër penale, këtu duhet me dhënë përgjegjësi, e prej këtu duhet me shku edhe te zyrat e ZRrE-së sepse nuk e kanë monitoru implementimin e vendimeve për tarifat e qytetarëve të Kosovës”, ka deklaruar Azemi para mediave.