Ministri i Jashtëm i Iranit, Abbas Araghchi, deklaroi se vrasja e tre gazetarëve në Liban përbën “jo vetëm një humbje të madhe për komunitetin mediatik në rajon dhe në botë, por edhe një thirrje serioze për ndërgjegjen globale”.
Ali Shoeib, gazetar i televizionit Al Manar – një rrjet i lidhur me Hezbollah – si dhe gazetarët e Al Mayadeen, Fatima Fetoni dhe Mohamed Fetoni, u vranë gjatë një sulmi ajror izraelit në qytetin Jezzine, shkruan BBC, transmeton Dukagjini.
Në një postim në rrjetet sociale, Araghchi i cilësoi sulmet si “një vrasje e qëllimshme” dhe një përpjekje për të “heshtur zërat e atyre që tregojnë të vërtetën”.
Nga ana tjetër, ushtria izraelite konfirmoi se kishte vrarë Ali Shoeib gjatë një sulmi, por e akuzoi atë se ishte një operativ i Hezbollahut që paraqitej si gazetar.
Kjo është hera e dytë që Izraeli akuzohet për shënjestrimin e gazetarëve në Liban që nga fillimi i luftës, sipas raportimeve nga korrespondentët në Lindjen e Mesme.