Gjykata Kushtetuese ka shpallur të papranueshme kërkesën e Partisë Demokratike të Kosovës (PDK) lidhur me vendimet e dy shkallëve të gjyqësorit për rastin e liberalizimit të tregut të energjisë, që përfshin detyrimin e rreth 1300 bizneseve për të kaluar në tregun e hapur të energjisë elektrike.
Sipas njoftimit të Zyra e Rregullatorit të Energjisë (ZRRE), ky vendim konsiderohet si konfirmim i ligjshmërisë së vendimeve të saj dhe i procesit të liberalizimit të tregut të energjisë në Kosovë.
ZRRE thekson se procesi i liberalizimit po vazhdon në përputhje me Ligjin për Energjinë Elektrike dhe aktet nënligjore në fuqi.
“ZRRE-ja vazhdon zbatimin e plotë të procesit të liberalizimit të tregut të energjisë elektrike, në përputhje të plotë me Ligjin nr. 05/L-085 për Energjinë Elektrike dhe aktet nënligjore përkatëse. Qëllimi i këtij procesi është krijimi i një tregu konkurrues, transparent dhe efikas, në interes të të gjithë konsumatorëve”, thuhet në njoftimin e ZRRE-së.