Brenda më pak se 24 orësh, situata në Ngushticën e Hormuzit ka kaluar nga optimizëm për rihapje në tension të ri, pasi autoritetet iraniane njoftuan rikthimin e bllokadës.
Të premten, Presidenti i SHBA-së, Donald Trump, përshëndeti një deklaratë nga Teherani se ngushtica ishte “plotësisht e hapur dhe gati për kalim të plotë”.
Në të njëjtën linjë, Ministri i Jashtëm i Iranit, Abbas Araghchi, sugjeroi në platformën X se lundrimi do të rifillonte normalisht, duke shtuar se Irani do të koordinojë rrugët detare, shkruan CNN, transmeton Dukagjini.
Deklaratat sollën reagim të menjëhershëm në tregjet globale, me çmimet e naftës bruto që ranë rreth 10 për qind brenda pak orësh.
Megjithatë, kjo situatë ndryshoi shpejt, ndërsa media gjysmëzyrtare iraniane Tasnim kritikoi komunikimin për paqartësi mbi kushtet dhe mekanizmat e kalimit.
Më pas, Trump deklaroi se bllokada amerikane ndaj porteve iraniane do të vazhdojë “me forcë të plotë” deri në përfundimin e një marrëveshjeje me Iranin.
Vetëm një ditë më vonë, Garda Revolucionare Islamike (IRGC) njoftoi se ka bllokuar sërish Ngushticën e Hormuzit, duke e lidhur vendimin me vazhdimin e presionit amerikan.
“Çdo afrim drejt Ngushticës së Hormuzit do të konsiderohet bashkëpunim me armikun dhe çdo anije që shkel këtë do të jetë objektiv sulmi,” thuhet në deklaratë.
Ngushtica e Hormuzit, një nga rrugët më të rëndësishme të transportit të energjisë në botë, mbetet në qendër të tensioneve mes SHBA-së dhe Iranit.
Pavarësisht sinjaleve të herëpashershme për dialog, të dyja palët duket se vazhdojnë të kenë mospajtime të thella, ndërsa një takim i ri mbetet vetëm një mundësi.
Deklaratat kontradiktore të Iranit krijojnë paqartësi për kalimin në Ngushticën e Hormuzit