Nuk është caktuar ende asnjë datë për raundin e ardhshëm të negociatave midis Iranit dhe Shteteve të Bashkuara, tha të shtunën zëvendësministri i jashtëm i Iranit, duke shtuar se më parë duhet të arrihet një kornizë mirëkuptimi.
Bisedimet e nivelit më të lartë midis SHBA-së dhe Iranit që nga Revolucioni Islamik i vitit 1979 përfunduan në Islamabad pa marrëveshje fundjavën e kaluar, shkruan Reuters, transmeton Dukagjini.
Presidenti amerikan Donald Trump i tha Reuters se me gjasë do të ketë më shumë bisedime të drejtpërdrejta këtë fundjavë, megjithëse disa diplomatë thanë se kjo është pak e mundshme për shkak të vështirësive logjistike të organizimit në Islamabad, ku pritet të zhvillohen bisedimet.
“Tani jemi të përqendruar në finalizimin e kornizës së mirëkuptimit midis dy palëve. Nuk duam të hyjmë në ndonjë negociatë apo takim që është i destinuar të dështojë dhe që mund të shërbejë si pretekst për një raund tjetër përshkallëzimi,” tha Saeed Khatibzadeh për gazetarët në margjinat e një forumi diplomatik në provincën jugore turke Antalya.
“Derisa të biem dakord për kornizën, nuk mund të caktojmë një datë… Në fakt është bërë përparim i konsiderueshëm. Por më pas qasja maksimaliste nga pala tjetër, duke u përpjekur ta bëjë Iranin përjashtim nga e drejta ndërkombëtare, na pengoi të arrijmë një marrëveshje,” shtoi ai, duke iu referuar kërkesave të SHBA-së lidhur me programin bërthamor të Iranit.
“Dua të jem shumë i qartë se Irani nuk do të pranojë të jetë përjashtim nga e drejta ndërkombëtare. Çfarëdo angazhimi që do të marrim, do të jetë brenda rregullave dhe ligjit ndërkombëtar.”
I pyetur për raportimet se Irani e kishte mbyllur sërish Ngushticën e Hormuzit të shtunën, pas rihapjes së përkohshme pas një armëpushimi 10-ditor të ndërmjetësuar nga SHBA midis Izraelit dhe Libanit të enjten, Khatibzadeh tha se Irani kishte njoftuar se do të lejonte kalimin e sigurt të anijeve tregtare në përputhje me kushtet e armëpushimit.
“Pala tjetër, pala amerikane, u përpoq ta sabotojë këtë duke thënë se është e hapur përveç për iranianët. Kjo ishte arsyeja pse ne thamë se ‘nëse do të shkelni kushtet e armëpushimit, nëse amerikanët nuk do të respektojnë fjalën e tyre, do të ketë pasoja për ta’,” përfundoi ai.