Sulmuesi i Kombëtares së Kosovës, Vedat Muriqi, vazhdon të jetë në qendër të vëmendjes në tregun e transferimeve, pavarësisht formës së shkëlqyer që po kalon te RCD Mallorca.
Sipas raportimeve të mediave turke, me në krye “Sabah”, Fenerbahçe ka arritur një marrëveshje preliminare me sulmuesin kosovar për një rikthim të mundshëm në Süper Lig.
Raportohet se Muriqi është i hapur për këtë transferim, ndërsa klubi turk po përgatitet të nisë negociatat zyrtare me Mallorcan. Sipas burimeve të njëjta, klubi spanjoll pritet t’i fillojë bisedimet nga shifra prej 10 milionë eurosh për kartonin e lojtarit.
Në anën tjetër, emri i Muriqit është lidhur edhe me një kalim të mundshëm te FC Barcelona, megjithëse vetë lojtari ka theksuar vazhdimisht se ndihet i lumtur në klubin aktual.
Kujtojmë se Muriqi ka kontratë me Mallorcan deri në vitin 2029, duke e bërë çdo transferim të mundshëm të varur nga marrëveshja mes klubeve.