Chelsea ka vendosur të shkarkojë trajnerin Liam Rosenior vetëm tre muaj pasi e kishte emëruar në krye të ekipit dhe i kishte ofruar kontratë gjashtëvjeçare.
Klubi londinez mori këtë vendim pas humbjes së rëndë 3-0 ndaj Brighton-it të martën mbrëma, një rezultat që u konsiderua si kulmi i një serie të dobët.
Rosenior kishte nisur mirë aventurën te “Blutë”, duke regjistruar gjashtë fitore në shtatë ndeshjet e para, por forma e ekipit më pas ra ndjeshëm, me shtatë humbje në tetë ndeshjet e fundit në të gjitha garat. Kjo situatë e ka vënë Chelsean në rrezik serioz për të mos siguruar pjesëmarrjen në garat evropiane sezonin e ardhshëm.
Në deklaratën zyrtare, klubi theksoi se vendimi nuk ka qenë i lehtë, por është marrë për shkak të rezultateve dhe paraqitjeve që nuk kanë përmbushur pritjet, duke shtuar se ende ka shumë për të luftuar në këtë sezon.
“Chelsea Football Club ka vendosur të ndajë rrugët me trajnerin Liam Rosenior. E falënderojmë për profesionalizmin dhe përkushtimin e treguar gjatë kohës së tij në klub,” thuhet në njoftim.
Chelsea tashmë përballet me një tjetër sfidë të madhe, pasi do të luajë ndaj Leeds United në gjysmëfinalen e FA Cup të dielën, një ndeshje që shihet si shpresa e fundit për trofe këtë sezon.
Klubi i drejtuar nga BlueCo do të kërkojë tashmë trajnerin e pestë të përhershëm që nga marrja e pronësisë në vitin 2022.