Komuna e Junikut ka njoftuar qytetarët se si pasojë e vërshimeve të fundit, rruga që çon drejt bjeshkëve është bllokuar përkohësisht për qarkullim.
Sipas njoftimit zyrtar, ekipet kompetente ndodhen aktualisht në terren dhe po punojnë intensivisht për sanimin e aksit rrugor Junik–Gjeravicë, me qëllim rikthimin sa më të shpejtë të qarkullimit normal dhe të sigurt për qytetarët.
Komuna u ka bërë thirrje të gjithë qytetarëve që të shmangin lëvizjet në këtë segment rrugor deri në një njoftim të ri, për shkak të rrezikut dhe pamundësisë së kalimit të sigurt.
Autoritetet lokale kanë theksuar se do të informojnë qytetarët në vazhdimësi lidhur me gjendjen në terren dhe përfundimin e punimeve në këtë aks rrugor.