Studentët kosovarë nga tash do të kenë më shumë avantazhe.
Diplomat e tyre do të njihen thuajse me automatizëm në Shtetet e Bashkuara të Amerikës, e përveç kësaj edhe përfundimi i studimeve atje është më lehtë i mundur.
Kjo vjen pas që Agjencia e Kosovës për Akreditim ka marrë statusin autoritet akreditues në Amerikë, pas vlerësimit që mori nga Këshilli për Akreditimin e Arsimit të Lartë CHEA në SHBA.
Një njohje si kjo, sipas drejtorit të Agjencisë, Naim Gashi, nuk i ndal përfitimet vetëm tek studentët.
“Diplomat e tyre do të njihen më shpejtë dhe më lehtë, qoftë për vazhdim të studimeve në Amerikë, qoftë për shkëmbime akademike, për bursa, do të përfitojnë edhe institucionet e arsimit të lartë në Kosovë për shkak se bashkëpunimi me universitetet amerikane do të jetë më i lehtë”, ka thënë Naim Gashi, Drejtor i Agjencisë së Kosovës për Akreditim.
Sipas Gashit, aktualisht Kosova është vendi i parë në Ballkanin Perëndimor që e gëzon këtë status.
“Çdo diplomë që posedon akreditim, qoftë në nivel programor apo institucional, do të njihet në Evropë dhe shtetet e Bashkuara, është jashtëzakonisht e rëndësishme për imazhin e sistemit të arsimit të lartë në Kosovë”, ka thënë Naim Gashi, Drejtor i Agjencisë së Kosovës për Akreditim.
Ndërkohë, njohësit e Arsimit në Kosovë shpresojnë se kjo do të kthehet në rritje të transparencës në punën e Agjencisë.
“Shpresojë shumë që anëtarësimi në këtë institucion të kthehet në përfitim në procedurat e brendshme dhe mbi të gjitha në rritjen e transparencës së punës së Agjencisë së Kosovës për Akreditim”, ka thënë Rinor Qehaja, Njohës i arsimit universitar.
Ky akreditim vlen për një periudhë shtatëvjeçare, por mund të ndërpritet nëse nuk respektohen kriteret, veçanërisht në rastet e ndërhyrjeve politike.
Ndërkohë, vetëm pak ditë më parë, më 27 prill, Kuvendi ka miratuar përbërjen e re të bordit të Këshillit Shtetëror të Cilësisë, i cili funksionon në kuadër të agjencisë.
Pjesë e anëtarëve është edhe Driton Vela, ish-kandidat i Vetëvendosjes për deputet, kandidatura e të cilit ishte kundërshtuar nga shoqëria civile dhe parti politike.